ന്യൂഡൽഹി: തെരുവ് നായ നിയന്ത്രണവുമായി ബന്ധപ്പെട്ട സുപ്രീം കോടതി ഉത്തരവ് തെറ്റായി വ്യാഖ്യാനിച്ച് രാജ്യത്ത് വ്യാപകമായി നായ്ക്കളെ കൊന്നൊടുക്കുകയാണെന്ന് ആരോപിച്ച് 'ആനിമൽസ് ആർ പീപ്പിൾ ടു' എന്ന എൻ.ജി.ഒ സുപ്രീം കോടതിയെ സമീപിച്ചു. പഞ്ചാബ് മുഖ്യമന്ത്രിയുടെ പ്രസ്താവനകളും കോളേജ് കാമ്പസുകളിൽ നിന്നുള്ള നായ്ക്കളുടെ കൂട്ട ഒഴിപ്പിക്കലും ചൂണ്ടിക്കാട്ടിയാണ് അടിയന്തര ഹർജി നൽകിയത്.
മെയ് 19-ലെ ഉത്തരവിൽ പേവിഷബാധയുള്ളതും അങ്ങേയറ്റം അക്രമാസക്തവുമായ നായ്ക്കളെ നിയമവിധേയമായി (കാരുണ്യവധം ഉൾപ്പെടെ) ഒഴിവാക്കാമെന്ന് ജസ്റ്റിസ് വിക്രം നാഥ് അധ്യക്ഷനായ ബെഞ്ച് വ്യക്തമാക്കിയിരുന്നു. എന്നാൽ ഇത് 1960-ലെ മൃഗസംരക്ഷണ നിയമത്തിനും 2023-ലെ എബിസി (ABC) ചട്ടങ്ങൾക്കും വിധേയമായി മൃഗഡോക്ടർമാരുടെ പരിശോധനയോടെ മാത്രമേ ചെയ്യാവൂ എന്നാണ് കോടതി പറഞ്ഞിരുന്നത്.
ഏതെങ്കിലും നായയെ 'അക്രമാസക്തം' എന്ന് മുദ്രകുത്തി കൊല്ലുന്നത് തടയാൻ മൃഗഡോക്ടറും എൻ.ജി.ഒ പ്രതിനിധിയും അടങ്ങുന്ന സമിതിയുടെ പരിശോധന നിർബന്ധമാക്കണമെന്നും, നിയമവിരുദ്ധമായ കൂട്ടക്കൊലകൾ തടയാൻ സംസ്ഥാന ഡി.ജി.പിമാർക്ക് നിർദ്ദേശം നൽകണമെന്നും ഹർജിയിൽ ആവശ്യപ്പെടുന്നു.
